قال حب قال ...

أهليــن بنات كيفكم ان شاء الله بخير


امم اكيد كلكم حتتسألوا مين أنا?!

أنا بنت من بنات مكه وانا طالبه في الجامعه ماقلت دي المعلومات تضيعا للوقت بس عشان تعرفوا انوا ماعندي شهادات في علم النفس او غيروا ولا انا من الفقهاء في الدين
يعني بالعربي حتكلم معاكم هرجة من بنت لبنت

دحين من البدايه انتي عندك خيارين

1- اما تقولي دي بنت فاضيه وبتضيع وقتي الثمين (( بس يابزنس ومن ))وتقفلي الموضوع أو
2- لمجرد فضول تكملي الموضوع وهوا لو ماافادك مرح يضرك ^_^

نبغى نتكلم عن موضوع الحب (( قال love قال ))

في البداية سألنا مجموعه من البنات
لو عندك 10 بنات عالمسن كم وحده منهم تتوقعي انها تكلم شاب وبينهم حب (( قال love قال))
شوفوا الردود

soso : اممم بصراااحه بصرااحه والصراحه راحه اممم كلـــــــــــــــــــهــــــــــم
<<<كلهم هع هع أجل انتي منهم ^_* طالما هما عندك عالمسن اجل هما صحباتك والقرين بقرينه يعرف و الله المستعان

shosho : اش السؤال الا مال |أمو داعي دا ,, احنا في 2009و2009 لازم يكون عند البنت شباب في المسن وحبيبها تكلموا جوال
(( !!!!! 2009 يعني الموضوع حسب التاريخ اهااا اجل في 2030 لازم يكون عند كل بنت شاب في البيت ,,على كده حنقفل كل مولات جده ونفتح بدالها دور رعاية الطفل عشان نؤوي أطفال العلاقات الغير مشروعه .,, قال 2009 قال ))

jojo :اممم امكن 2 بس الا يكلمو واااحد ,, (( الحمد لله الناس لسه بخير )) بس الباقين يكلمو0 1 في نفس الوقت((( لا لا غيرت رأيي الدنيا باااايظه بااايظه,, هي خاربه خاربه خلونا نعميها ))

lo0o0ola : امم 7 يمكن والثلاثه الا مايكلموا تلاقي وحده مطوعه واتنين مخطوبات (( اذا كل بنت لما تنخطب معد تكلم شباب فياارب جوز كل البنات وأنا أولهم ^_* ))
:بيشو: ولا وحده طبعا ماتكلم شباب (( الحمد لله أخيرا جواب شافي )) عشان أنا وشلتي كلنا ليزبو ((بنات يحبو بنات ))الله يرحمنا برحمتو

آآآآآآآآآآآآآآه اش تستنوا قوموا أطلبولي الإسعاااااااف 997

طيب طيب حبه حبه خلونا نحاول نفهم شي شي


خليا في الحب (( قال لوف قال )) وبتكلم عن الا يحبوا واحد مو عشره (( وهما مايحبوا عشره عشان قلوبهم كبيره لا ,,بس عشان قلوبهم رخيصه الكل يحاول يكسبها مو زي القلب الغالي مو أي احد يحظى بيه ))

زمان كانت البنت تحب عشان تعوض نقص موجود عندها في البيت وتلاقيها تخبي الموضوع وماتقول لمخلق
اليوم البنت الا مبسووطه مره في حياتها تحب عشان تدور شي ينكد عليها وتلاقيها تتفشخر بقصتها ولو بيدها نشرتها عالتي في وفي النت ...
طيب برضو سألنا مجموعه بنات انتوا ليش تحبوا ؟!؟!
شوف العجب العجاااب في الردود

1- اممم القلب انخلق عشان يحب (( طوووط اجابة خاطئه )) القلب انخلق عشان يضخ الدم لباقي أعضاء الجسم ....ماعلموكي في المدرسه
2- عشان لما اسمع أغاني الشوق أسرح في حبيبي ولما نتضارب اسمع اغاني بعد وفراق (( ياشيخه انتي الامكسبه روتانا من غيرك حيقفلوا القناه )) قال حب قال
3- اممم عشاااان احكي صحباتي على مغامراتي مع حبيبي (( يااختي لما انتي حكاواتيه وتحبي تحكي ,,السوق مليان روايات اشتري وحكيهم ,,حبكت يعني تكوني انتي بطلة القصه )) لا لا انا بحكيهم قصة واقعيه مو زي الروايات خيال في خيال (( أقص يدي لو حكايتك مو كلها ركب في ركب وبكش في بكش
ياانتي تبكشي على صحباتك ياهو الا مبكش عليكي )) قال واقعيه قال
4- عشان خايفه من العنوووسه ((ههه وربي ضحكتني يعني خلاص بجيب اموا وجي يخطبك طيب افرضي جابها وشافك وماعجبتيه )) لا لا انا وريتوا صورتي (( كماان من جد جات تكحلها عمتها زمان كانوا الشباب يسرقوا صور البنات ويبتزوهم بيها دحين صارت البنت هيا الا ترسل صورتها للشباب اذا ماارسلتلوا الألبوم كلوا))
ولا الفيس بوك والنت لوق والتاجد وغيرو وغيرو
حدث ولا حرج
صور عجيبه غريبه
تشوف الصورة صح ان الصوره جسم بدون وجه بس جسم ايش الا متقصوعه والا متنفقصه والا عارضه صورتها على بالها انها في مجلة بلاي بوي (( أشهر مجلة اباحيه عالميا ))
لا وكل وحده حاطه اسمها او دلعها عالصورة قال ايش(( حقوق النشر محفوظه )) دحين بلله ناشره صورتك وكمان عليها اسمك يعني اذا ماعرفتني من الصورة اعرفني من اسمي
وربي لو حطت صورة وجهها بدون جسمها استرلها على الأقل ان حسب ماسمعت أحمد الشقيري يقول في برنامج خواطر شباب حلقة المعاكسات (( ان المذاهب اختلفت في حجاب المرأة وبعض العلماء اباحوا كشف وجه المرأة وكفيها )) يعني اقلوا تبيني صورة شي اختلفوا فيه العلماء مو شي اجمع الكل على تحريموا

<<< ياخوفي بكره ؟أدخل النت ألاقي كل البنات منزلين صور وجيههم

طيب لحظه لحظه اشبك قايمه تجري تجيبي الكاميرا وتصوري وجهك اصبري افهمي
دحين حتى لو قلنا عادي تنزلي صورة وجهك تخيلي نزلتيها وانتي ادميه محترمه وبنت ناس
وجات وحده بنت كــ****ب ماتخاف ربها وأخدت صورك وراحت تكلم فلان وعلان ومحادثاتها والعياذ بلله كلها قله حيا وكلام ناس مايختشوا وقلها الحمار الا بيكلمها ابغى اشوفك وحطت صورتك ؟ طيب بلاش بنت كـــ**ب خليها بنت وخلصنا واتعرفت على واحد وحطت صورتك وطلع الواحد دا اخوكي ولا ولد خالتك ولا خطيبك المستقبلي تخيلي ؟!
ايش بتستفيدي ؟؟ ناس قالولك انتي حلوة وزي القمر ولا انتي كوول ولبسك أخر شياكه بس هدمتي مو سمعتك بس لا سمعة عيلتك كلها فكري معايا هل اهلك يستاهلوا منك دا الشي
(( انا عارفه مو كل الاهل زي اهلي الله لا يحرمني منهم بس مهما سوا هل توصل لدرجة تخلي شرفهم على كل لسان عشان ايش صوره نزلتيها وغيرك نشرها ))
طيب جا دحين وقت بسألك فيه 3 أسأله بس وجاوبي بصراحه
هنا مافي غيري انا وانتي ومهما جاوبتي محد من البشر حيعرف جوابك
1-إنتي تخافي ربنا ؟ لو جوابك لا (( عليكي العوض ومنك العوض ماأقول الا الله يهديكي بس اقفلي الصفحه الكلام معاكي مامنوا رجا
لو جوابك ايوه الله يثبتك ويعينك على طاعتوا وكملي الموضوع
2-انتي بنت ناس ؟(( لو جوابك لا )) سو وجهك زي قفاكي الله يستر عليكي اتوكلي على الله واقفلي الصفحه احنا هنا بنتكلم مع ناس في منها رجا ولسه فيها خير
لو جوابك ايوه الله يسعدك دنيا وأخره ويغفرلك وكملي الموضوع
السؤال التالت والأخير
هل انتي مقتنعه بحياتك ومنتي شايفه الا بتسوية غلط
لو جوابك ايوه (( اخرجي وفكري في الموضووووع مره واتنين وتلاته ))
لو جوابك لا كملي قرايه والله يزيل همومك وريح بالك

شايفه لحد الان انتي كسبتي دعوات زي العسل ^_*

طيب في كتير بنات غلطوا وجا الوقت الا يبغوا يصلحوا فيه كل شي
في بنت تقول لحبيبها انا خلاص انخطبت ولازم نقطع علاقتنا وهيا كدابه
وبنت توصلوا مع وحده من صحباتها ان اهلها كفشوها وحرموها من الابتوب والجوال
او وحده تقول ان صار لها حادث وماتت او في العنايه المركزة
بس كدا غلط
عمروا ماكان الحل اننا نعالج الغلط بغلط
اولا لان ممكن في يوم يكتشف انك كدبتي ويفكر ينتقم وثانيا وهوا الأهم انتي بعد فتره حتدوري على شخص غيروا عشان يسد المكان الا تركوا
طيب أكيــــــد كلكم تقولو ايش الصح يافيلسوفة زمانك

الصح ببساطه انك تقوليلو بكل بساطه (( أنا أحبك بس أنا حبيتوا أكتر منك ))
(( انتي أكيد مجنونه نبغيني أقول لحبيبي أنا حبيتوا أكتر منك ))
يب تقوليلوا انا حبيتوا اكتر منك عارفه بتكلم عن مين عن ربنــــا
قوليلوا انك حبيتي ربنا أكتر
ربنا الا أكرم عليكي بكل النعم الا عندك والا لو جلسنا نعددها ماخلصنا اعطاكي الصحه والعقل والمال والجمال
غيرك كتير يتمنى الصحه عشان يسجد لله سجده وانتي 24 ساعه مسنتره قدام اللاب توب عالمسن او الفيس بوك
وغيرك كتير ماعندهم فلوس يدبروا اكل ليومهم وانتي فلوسك رايحه في فاتورة الدي اس ال والجوال طيب سيبيكي من دا كلوا
مايكفيكي انوا ربنا ستر عليكي لحد الان ومااحد اكتشف علاقتك بدا الشاب وصارت سمعتك على كل لسان
لازم لما تقولي انك حتتركيه لأنك تحبي ربنا أكتر تستشعري العبارة وتكوني قاصدتها وربنا حيعوضك خير ان شاء الله
ولو حاول انوا يغير لك رايك قوليلوا لو انت كمان تحب ربنا لازم تحترم قراري وتسيبني عشان ربنا
بكدا انتي الكسبانه انا عارفه الفعل اصعب من الكلام بس عشان
ربنا يرضى علينا أولا بعدين عشان أهلنا الا مايستاهلوا مننا نخون ثقتهم وبعدين عشان أنفسنا واننا نكون ناس أفضل
كل شي يهون
صدقيني حتصير حياتك مرره احسن هدوء وراحة بال حترجعي ترفعي راسك بين الناس وتكلمي اهلك بكل ثقة وتفتخري بنفسك
لأنك أنثى صعبة المنال تماما زي الجوهره الغاليه محد يقدر يوصلها الا الا يستاهلها

دا كان كلامي في النهايه لو ماعجبك او عجبك فارسليه لكل البنات الا عندك يمكن تريحي بال وحده منهم وتدعيلك دعوه حلوة في جوف الليل


(( خير ماأتمنى في الوجود ,, دعائك لي عند السجود ،، ومرافقتك بجنة الخلود ))

وأعتذر عن الإطاله وإن كنت أخطأت أو جرحت أي وحده بدون ماأقصد

للأمانه منقوول
وصلني ايميل
وحبيت انشرره لأنه كتيير اعجبني
وحبيت تستفيدوا منه
لا تحرمووني من ردودكم

انتي اخطر يا خطيرة

يسلمووووووووووووووووو


يعطيك ربي العافيه خيتووو

allah yslmek

يعطيكي ربي العافيه

يسلمؤؤؤؤؤؤؤا ع المجهوووووود الراااائع ياقمــــــ{


دمتي بووود...~}!}